Unad (उनाड)

Reader's Reviews

1. Priyanka Sarwar
   ‘उनाड’ ची नवी प्रत आली आणि कालपासून जवळजवळ सर्वच कविता वाचून झाल्या.
   स्वप्निल दादा लिहायचा म्हणजे थेट काळजात भिडायचं. पुस्तक वाचतानाही तसंच काही झालं.
   इतिहास आणि छत्रपती शिवाजी महाराजांवर नितांत प्रेम करणारा माणूस तितकाच संवेदनशील असतो, भावनिक असतो हे ह्या कविता संग्रहातून तुम्हाला जाणवेल.
   “शब्दांचे हे असे मुकेपण
   अन श्वासांवरती दाटलेले धुकेपण“
   असं काही वाचल्यावर आपलेच शब्द मुके होतात. अशा अनेक अप्रतिम कविता या कवितासंग्रहात आहेत.
   त्यातली हुल्लड वारा कवितेतील ओळी पाहिल्या, कितीतरी वेळा पुन्हा पुन्हा वाचल्या.
   ज्यांना कविता आवडतात, त्यातील भाव समजतात, ज्यांचा प्रेमावर विश्वास असतो, आणि त्यातल्या सगळ्याच भावनांना जे जपतात, अशा प्रेम करणाऱ्या सगळ्यांसाठी हे पुस्तक आहे.
   एक हळवा, संवेदनशील कवी ह्या पुस्तकाच्या रूपाने तुम्हाला भेटेल. ह्या पुस्तकातील प्रत्येक कविता एक विचार घेऊन तुमच्या मनात घर करते.
   दुःख, वेदना, प्रेम, विरह, सोबत, मैत्री, आनंद, आई, वडील या सगळ्या नात्यातील धागेदोरे “उनाड” ह्या काव्यसंग्रहात बांधले गेलेले आहेत.

   पुस्तक बंद केल्यावर,
   “फांद्या तुटतानाही घरटी जपतो,
   एक असे मी झाड आहे,
   माझ्या भरारीवर जाऊ नकोस सये,
   मी खरंच ‘उनाड’ आहे…”
   ह्या ओळी वाचत वाचत तुम्ही चिंतन करत राहता. सर्वांनी नक्की वाचावे असे हे पुस्तक आहे.

2. युवराज रेपे
   कविता….
   काय असते कविता, कशी असते कविता, का करतात कविता, कोण करतं कविता? असे खूप सारे प्रश्न, याचं उत्तर एखादा कवीच देऊ शकेल.

   ज्या शब्दरचनेतून लिहिणाऱ्याच्या आणि वाचणाऱ्याच्या भावना एकरूप होतात, ती शब्दरचना म्हणजे कविता आणि अशी शब्दरचना करण्याच सामर्थ्य ज्याच्या लेखणीत असते तो कवी. असे कवी लोक शोधत तुम्हाला कुठे जायची गरज नाही, फक्त तुमचं मन कवी असलं पाहिजे.
   बस मग ते तुम्हाला कुठेही भेटू शकतात, चहाच्या टपरीवर, बस्टॉपवर, एखाद्या गडावर, नदीवर, नदीवरच्या पुलावर, घाटावर, मंदिरात अगदी स्मशानातही…
   असाच एक कवी मला भेटला. तो ही रायगडी. निष्ठा जपायला शिकवणारा, इतिहास जगायला शिकवणारा.. एक उनाड कवी स्वप्निल रामदास कोलते पाटील, पण दुर्दैवाने ती रायगडची भेट शेवटची ठरली. आता उनाड शरीराने भेटू शकत नसला तरी, तो परत परत भेटायला आलाय तोही शब्द रूपात, त्याच्या ‘उनाड’ या काव्यसंग्रहातून.
   त्यांच्या कविता नावाप्रमाणेच उनाड आहेत, कविता प्रेमाला आधार देणारी, कविता स्वत:चा स्वभाव सांगणारी, कविता तिचं वेगळपण दाखवणारी, कविता तिच्या प्रेमाच्या, कविता विरहाच्या, कविता तिला मनवण्याच्या, कविता निरोपाच्या, कविता पावसाच्या, कविता बावरलेल्या राधेच्या, मैत्रीचं नातं आता त्याच्या पुढं गेलं हे मैत्रिणीला सांगणारी कविता, स्वत:चा हट्ट सांगणारी कविता, काळजात दाटलेलं आभाळ मोकळं करणाऱ्या कविता, तुझ्यासाठी कोणीतरी आहे म्हणून सांगणारी कविता, तिच्या जाण्यानं तिच्यावर केलेली कविता, तिच्यात दिसणाऱ्या विठ्ठलाची कविता..
   मनाला उनाड करणाऱ्या कविता… या कविता वाचताना त्यांनी तुम्हाला तुमच्या ह्दयाला आरपार छेदून आपल्याश्या करत तुम्हाला आठवणींच्या महापुरात ढकलून दिलं नाही तर नवलच…

3. Akshata Shinde
   ‘ उनाड ‘
   लेखक – स्वप्नील रामदास कोलते-पाटील

   भाऊचं पुस्तक पण त्याच्या नावाप्रमाणेच आहे.
   फांद्या तुटतानाही घरटी जपतो
   एक असे मी झाड आहे,
   माझ्या भरारीवर जाऊ नकोस सये
   मी खरचं ‘उनाड’ आहे…
   काही कवी कविता लिहिताना भावना मांडतात, अनुभव लिहितात, पण उनाडने ह्या सगळ्या कविता जगल्या आहेत..
   ह्या कविता नव्याने प्रेम करायला शिकवतात,
   प्रेम जगायला शिकवतात,
   ते प्रेम अमर ठेवायला शिकवतात.
   मला जेव्हा पहिल्यांदा कळलं भाऊचं कवितांचंही पुस्तकं आहे, तेव्हा सिध्दार्थ दादाकडून पुस्तकं मागवून घेतलं, वाचलं. काही कविता मनाला भेदल्या, तर काहींनी पुन्हा प्रेमात पडायला शिकवले.
   प्रेम, विरह, अपेक्षा, विद्रोह अशा अनेक भावनांचे अनेक पैलू ह्या पुस्तकात मांडलेले आहेत, ह्यात कवी कधी वैचारिक तर कधी भावनिक वाटतो, कधी अल्लड तर कधी समजूतदार वाटतो.
   प्रत्येक व्यक्तीला प्रेम करायला लावणारं, प्रेमात पडायला शिकवणारं पुस्तकं म्हणजे उनाड’.

   तुम्ही सगळ्यांनी हे पुस्तक नक्की वाचायला हवं.